Նախագծի մասին

Armenia Counter-FIMI Hub 2026 (ARM CFH 26)-ը օպերատիվ և վերլուծական նախագիծ է, որի նպատակն է ամրապնդել Հայաստանի կարողությունները՝ հայտնաբերելու Օտարերկրյա տեղեկատվական մանիպուլյացիաները և միջամտությունները (FIMI) հետընտրական շրջանում և քաղաքական ցիկլի հաջորդող փուլերում։

​

Նախագիծը հիմնված է այն ենթադրության վրա, որ ազդեցության գործողությունների հայտնաբերման հիմնական սահմանափակումը ոչ թե առանձին տեղեկությունների պակասն է, այլ այնպիսի մեխանիզմի բացակայությունը, որն ի վիճակի է ցրված ազդանշանները վերածել ստուգված, համեմատելի և վերլուծական տեսանկյունից օգտակար գիտելիքի։ Տեղական քաղաքացիական հասարակության կազմակերպություններն ունեն հասանելիություն տարածաշրջանային տեղեկատվական միջավայրերին, համայնքներին և աղբյուրներին, սակայն նրանց դիտարկումները միշտ չէ, որ հավաքագրվում են ընդհանուր ստանդարտների համաձայն կամ ներառվում են իրավիճակի ավելի լայն գնահատման մեջ։

​

ARM CFH 26-ը ստեղծում է նման մեխանիզմ՝ համատեղելով հայաստանյան 8-12 հասարակական կազմակերպությունների ցանցը, FIMI-ի հայտնաբերման միասնական մեթոդաբանությունը, փորձագիտական մենթորությունը և Օպերատիվ կենտրոնը (Operational Hub)՝ անվտանգ միջավայր միջադեպերի փաստաթղթավորման, տեղեկատվության փոխանակման և վերլուծական աշխատանքների իրականացման համար։ Նախագծում կներգրավվեն 12-ից 20 ներկայացուցիչներ այնպիսի կազմակերպություններից, որոնք գործում են ինչպես Երևանում, այնպես էլ Հայաստանի այլ մարզերում։

​

Մասնակիցները մոնիտորինգի կենթարկեն ընտրված թվային հարթակները, լրատվամիջոցները, հաղորդակցության ուղիները և տարածաշրջանային տեղեկատվական միջավայրերը։ Հայտնաբերված իրադարձությունները կանցնեն տրիաժ (առաջնահերթությունների սահմանում), ստուգում, դասակարգում, ինչպես նաև դրանց ռիսկերի և հնարավոր ազդեցության գնահատում։ Առանձնահատուկ նշանակություն ունեցող միջադեպերի հիման վրա կմշակվեն դեպքերի ուսումնասիրություններ (case studies), նախազգուշացումներ և իրավիճակային վերլուծություններ։ Բոլոր արդյունքները կպատրաստվեն ապացուցողական ընդհանուր ստանդարտների և որակի ապահովման ընթացակարգերի համաձայն։

​

«INFO OPS Polska» հիմնադրամը նախագծին է փոխանցում տեղեկատվական և հոգեբանական գործողությունների հայտնաբերման, FIMI-ի վերլուծության, վաղ արձագանքման համակարգերի մշակման և մոնիտորինգի տվյալները իրավիճակային գնահատականների վերածելու իր փորձը։ Հայաստանյան գործընկերների հետ համագործակցությունը թույլ կտա մեթոդաբանությունը հարմարեցնել տեղական տեղեկատվական միջավայրին և համատեղել վերլուծական կարողությունները տարածաշրջանային փորձագիտության հետ։

​

Նախագծի արդյունքը կլինի ոչ միայն մասնակիցների իրավասությունների բարելավումը, այլև, առաջին հերթին, կայուն համագործակցության մեխանիզմի ստեղծումը՝ կազմակերպությունների գործող ցանց, միջադեպերի համատեղ ռեգիստր, կառուցվածքային գիտելիքների բազա և սպառնալիքի հայտնաբերումից դեպի դրա վերլուծական գնահատում ավելի արագ անցնելու կարողություն։ Նախագծի նպատակն է բարձրացնել իրավիճակային իրազեկվածությունը փորձագիտական, ինստիտուցիոնալ և քաղաքացիական համայնքներում և ուժեղացնել Հայաստանի տեղեկատվական միջավայրի դիմակայունությունը արտաքին ազդեցության գործողությունների նկատմամբ։

• Իրականացման տարածքը՝ Հայաստան

• Մեկնարկի ամսաթիվը՝ Օգոստոս, 2026թ․

• Տեղական գործընկեր՝ Արտաքին քաղաքականության և անվտանգության Երևանի կենտրոն (Yerevan Center for Foreign and Security Policy)

• Նախագիծն իրականացվում է աջակցությամբ՝ Ժողովրդավարության եվրոպական հիմնադրամի (European Endowment for Democracy)